Össur kominn með lyklavöld í utanríkisráðuneytinu

Össur Skarphéðinsson tók við embætti utanríkisráðherra í gær af svilkonu sinni Ingibjörgu Sólrúnu Gísladóttur, formanni Samfylkingarinnar. Formleg lyklavöld fékk hann í morgun þegar Ingibjörg afhenti honum lykla af ráðuneytinu.

Össur mun áfram gegna embætti iðanaðrráðherra líkt og hann hefur gert frá því í maí 2007.

Þar með hafa allir ráðherrar nýju ríkisstjórnarinnar tekið við ráðuneytum sínum en Ingibjörg tók ekki sæti í nýrri ríkisstjórn Jóhönnu Sigurðardóttur.

Ingibjörg er þessa stundina að kveðja starfsfólk ráðuneytisins en hún tilkynnti í gær að hún hygðist nota tímann framundan til að huga að sjálfri sér og síðan að undirbúa kosningar og kvaðst hvergi nærri hætt í stjórnmálum.