Bankaræningi fékk hjartastopp í löggubíl

Karlmaður sem lögregla handtók á níunda tímanum í kvöld í útibúi Kaupþings í Austurstræti fékk hjartastopp í lögreglubifreið. Hann var í framhaldinu fluttur á slysadeild og að sögn varðstjóra bar endurlífgun lögreglumanna árangur. Ekki er vitað um líðan mannsins að öðru leyti.

Maðurinn braut sér leið inn í útibú Kaupþings í Austurstræti og hafði náð talsverðu magni af skiptimynt þegar lögregla bar að. Að sögn varðstjóra var maðurinn, sem er af erlendu bergi brotinn, í annarlegu ástandi en hann var jafnframt æstur og ógnandi. Lögreglu tókst að yfirbuga manninn og var hann fluttur á brott í stórri lögreglubifreið. Á leiðinni á lögreglustöðina við Hverfisgötu fékk maðurinn hjartastopp og var hann eins og áður sagði fluttur í skyndi á slysadeild.

Ekki fengust frekari upplýsingar um málið hjá lögreglu.