Umsvifamiklir í ESB og Afríku

Samherji hf. kemur að útgerð í þremur Evrópusambandsríkjum og tveimur löndum í Afríku. Dóttur- og hlutdeildarfélög fyrirtækisins reka á annan tug skipa, fiskvinnslur, pökkunarverksmiðju og söluskrifstofu. Þetta kemur fram í fjórða hluta fréttaskýringar um ESB og sjávarútvegsmál.

Fyrirtækið hefur aðgang að 30 þúsund tonnum af bolfiski og velta fyrirtækjanna var um fimmtíu milljónir evra árið 2008. Um 70 prósent af umsvifum fyrirtækisins eru erlendis. Haraldur Grétarsson, framkvæmdastjóri eins dóttur­fyrirtækis Samherja, DFFU í Þýskalandi, segir í viðtali að fiskveiðistjórnun innan ESB sé í mörgu til fyrirmyndar og tækifæri felist í efnahagslegum stöðugleika sem ríkir innan ESB.