Stálu rútu í nótt

Lögreglan leitar nú að 51 manna hvítri Scania rútu sem var stolið í nótt frá fyrirtækinu Bílar og Fólk. Fyrirtækið er með aðsetur á Krókhálsi en þangað brutu þjófar sér leið inn í nótt og stálu margvísislegum hlutum og svo heilli farþegarútu.

Að sögn varðstjóra er ekki ljóst hverju þeir stálu fyrir utan rútuna. Innbrotið uppgötvaðist í morgun þegar starfsmenn komu til starfa.

Að sögn varðstjóra er það skelfilegt að vita til þess að einhver sem hugsanlega kunni ekki að fara með svona faratæki sé núna í umferðinni, jafnvel undir áhrifum áfengis eða eiturlyfja.

Eins og fyrr segir er rútan hvít með númerinu UH-941. Þeir sem verða varir við hana vinsamlegast hafið samband við lögregluna á höfuðborgarsvæðinu í 112 eða 444 1000.