Vörur frá Ísrael sniðgengnar

Hákoni Má Oddssyni ofbýður ofbeldis­verk Ísraelsmanna. „Ég sem neytandi hef áhuga á að vita hvaða vörur í búðunum eru frá Ísrael svo að hægt sé að sniðganga þær og tryggja að maður sé ekki að styrkja hernað þeirra gegn börnum og konum,“ skrifar hann. „Fór í Bónus í dag og sá sellerí sem virtist ferskt og flott en á kassanum sem var utan um vöruna kom fram að uppruni væri Carmel og ég hætti samstundis við að kaupa selleríið. Mér er óglatt af tilhugsuninni að ég væri að borða mat hvurs ágóði sé notaður til að myrða saklaus börn. Gætirðu hjálpað okkur neytendum með að grafa upp hvaða vörur koma frá Ísrael svo við getum sniðgengið þær?“

Stærsti hluti innflutnings hingað frá Ísrael er ávextir og grænmeti. Vörur eiga að vera merktar í búðunum eftir upprunalandi. Í grænmetisdeildinni sá ég að sumar kryddjurtir sem Bónus er að selja eru frá Ísrael. Einnig avókadóið, bæði í lausu og í neti. Annað sá ég ekki merkt Ísrael. Ávextir og grænmeti eru árstíðarbundnar afurðir og misjafnt eftir árstíðum hvaðan vörurnar koma. Neytendur verða því að vera á tánum.

Ég hafði samband við tvo innflytjendur. Örvar hjá Banönum segir að það komi tveir kassar á viku af Sharon fruit (kaki) frá Ísrael. Stundum eru sætu kartöflurnar frá Ísrael og eitthvað af kryddjurtum. Sigurður hjá Búri fullyrðir að fyrirtækið flytji ekkert inn frá Ísrael í augnablikinu – „og við myndum hika verulega við það eins og málum er háttað í dag,“ segir hann.

Frægasta ísraelska vörumerkið er líklega Jaffa, en appelsínur og fleiri ávextir frá því fyrirtæki hafa fengist hér. Hallamál, kítti og verkfæri eru flutt inn frá Ísrael þó í litlum mæli sé.