Mótmælt á Austurvelli

Safnast verður saman á Austurvelli í dag 16. helgina i röð á mótmælafundi Radda fólksins. ,,Þrátt fyrir áfangasigur með yfirlýsingu um kosningar 9. maí nk. má ekki slaka á. Þjóðin getur ekki búið við vanhæfa ríkisstjórn deginum lengur. Sömu stjórnirnar sitja sem fastast í Seðlabanka og Fjármálaeftirliti og útrásarvíkingarnir leika lausum hala. Sameinumst um að reka endahnút á siðleysi og spillingu - hefjum vorhreingerningar í íslenska stjórnkerfinu," segir á vef samtakanna.

Raddir fólksins harma alvarleg veikindi Geirs H. Haarde, forsætisráðherra, og óska honum velfarnaðar og góðs bata. Jafnframt fagna samtökin velheppnaðri aðgerð á Ingibjörgu Sólrúnu Gísladóttur, utanríkisráðherra, og bjóða hana velkomna heim.

Þeir sem flytja ræður á fundinum á eftir er Magnús Björn Ólafsson, blaðamaður á hinu kommúníska dagblaði Nei. Hildur Helga Sigurðardóttir, blaðamaður, Jakobína Ingunn Ólafsdóttir, stjórnsýslufræðingur og Guðmundur Andri Thorsson, rithöfundur.