Glundroði í stjórnarsamstarfinu

Alger glundroði er í samstarfi stjórnarflokkanna, sem standa hvorki saman inn á við né út á við, segir stjórnmálafræðiprófessor. Samfylkingin hagnast á því að flýta kosningum, Sjálfstæðisflokkur tapar.

Óhætt er að fullyrða að ríkisstjórnarsamstarfið hangi á bláþræði, gjáin milli Samfylkingar- og Sjálfstæðismanna virðist breikka dag frá degi.

Gunnar Helgi Kristinsson prófessor í stjórnmálafræði við H.Í. segir stöðuna í stjórnmálunum flókna, enda standi stjórnarflokkarnir hvorki saman í ríkisstjórn né út á við.

Mikil refskák er í gangi, en nokkrar leiðir eru færar í stöðunni. Þótt erfitt sé, geta stjórnarflokkarnir ákveðið sameiginlega að flýta kosningum, en halda samstarfinu áfram fram að því. Í annan stað getur forsætisráðherra farið á fund forseta Íslands og sagt að ríkisstjórnarsamstarfinu sé lokið. Þá þarf forsetinn að finna leiðir til að mynduð verði einhvers konar starfsstjórn, til að mynda gæti Samfylkingin þá þegið boð Framsóknar og Vinstri grænna um það að mynda einhvers konar starfsstjórn fram að kosningum.

En hvað sem öðru líður þá virðist nokkuð ljóst að hagsmunir stjórnarflokkanna fari ekki saman um það hvenær skuli boða til kosninga og það eykur enn á spennuna.