Nytjastofnarnir eru ágætlega settir

Nýlokið er fundi ráðgjafarnefndar Alþjóðahafrannsóknaráðsins þar sem fjallað var um ástand nokkurra nytjastofna í Norðaustur-Atlantshafi og tillögur um nýtingu þeirra. Meðal þeirra eru norsk-íslensk vorgotssíld, kolmunni og makríll en þar sem veiðar úr þessum stofnum eru alþjóðlegar hefur Hafrannsóknastofnunin komið að mati á stærð og veiðiþoli þessara stofna með virkri þátttöku í vinnunefndum og ráðgjafarnefnd ráðsins og stofnunin þannig komið að mótun ráðgjafarinnar.

Stærð hrygningarstofns norsk-íslensku síldarinnar árið 2009 er metin á um þrettán milljónir tonna, sem er um milljón tonna aukning miðað við undanfarin þrjú ár. Alþjóðahafrannsóknaráðið telur að stofninn sé nýttur á sjálfbæran hátt. Samkvæmt tillögu ráðsins verður aflamarkið 1,5 milljónir tonna árið 2010.

Kolmunnastofninn fer minnkandi og síðustu árgangar eru metnir nálægt sögulegu lágmarki. Þetta kemur niður á afla en tillaga er gerð um aflamark sem nemur 540 þúsund tonnum árið 2010.

Hrygningarstofn makríls er metinn 2,6 milljónir tonna. Gert er ráð fyrir að aflinn á árinu 2009 verði rúm 800 þúsund tonn, þar af afli Íslendinga 112 þúsund tonn. Ráðið leggur til að heildaraflinn á árinu 2010 verði á bilinu 527-572 þúsund tonn. - shá