Ógreiddur reikningur þrefaldaðist vegna innheimtukostnaðar

Ógreiddur reikningur vegna lækniskostnaðar nærri þrefaldaðist eftir að lögfræðistofa rukkaði sjúklinginn um 12 þúsund krónur í innheimtukostnað. Gjörsamlega siðlaust, segir sjúklingurinn sem ætlar ekki að greiða innheimtukostnaðinn.

Sverrir Jóhannesson fór í læknisskoðun á LSH í september á síðasta ári. Fyrir þessa skoðun var Sverrir rukkaður um tæpar 8 þúsund krónur.

Reikningurinn lá ógreiddur hjá Sverri í sjö mánuði. Í síðustu viku barst honum svo innheimtubréf frá lögmannsstofu Jóns Egilssonar og Auðar Bjargar Jónsdóttur.

Þar kemur fram að auk dráttarvaxta upp á 1.434 krónur er Sverri gert að greiða 12.310 krónur í innheimtukostnað til lögfræðistofunnar.

Alls hljóðaði reikningurinn upp 21 þúsund og sjö hundruð krónur.

Sverrir segist einfaldlega hafa gleymt að borga reikninginn á sínum tíma. Innheimtukostnaðurinn sé hins vegar of hár. „Ef þetta er löglegt þá finnst mér það alveg gjörsamlega siðlaust," segir Sverrir.

Samkvæmt reglugerð um hámarksfjárhæð innheimtukostnaður er ekki leyfilegt að rukka meira en tvö þúsund krónur í innheimtukostnað ef höfuðstóll er undir tíu þúsund krónum eins og í þessu tilfelli. Kostnaðurinn er þó breytilegur en getur aldrei orðið meiri en sex þúsund krónur samkvæmt þeim lögmönnum sem fréttastofa talaði við í dag.

Sverrir segist ætla að borga reikninginn en ekki innheimtukostnaðinn.