Westlife á leið til Íslands

„Þeir ætla að hafa svona snjó-áherslur í myndbandinu, jökla og ísjaka,“ segir Leifur B. Dagfinnsson hjá framleiðslufyrirtækinu True North. Írska strákasveitin Westlife er væntanleg til landsins um helgina í þeim erindagjörðum að taka upp myndband við nýtt lag. True North mun sjá um tökurnar hér en Leifur segir ekki ljóst hversu stórt myndbandið sé í sniðum, að öllum líkindum verði það þó tekið upp í kringum Jökulsárlón þar sem fjölmargar erlendar auglýsingar, myndbönd og kvikmyndir hafa verið gerðar.

Karlarnir í Westlife hafa vafalítið ekki gert sér grein fyrir því að þeir gætu ekki hafa valið sér betri tímasetningu því í dag hefst tónlistarhátíðin Airwaves og stendur fram yfir helgi. Helstu skemmtistaðir borgarinnar verða því þéttsetnir af fólki sem hefur reyndar annan tónlistarsmekk en Westlife stendur fyrir. Þeir ættu þó að geta fundið sér tíma til að kíkja aðeins á tónleikahaldið þótt Leifur segi að heimsóknin muni verða stutt. „Þeir koma degi áður en tökurnar hefjast og fara strax á sunnudagsmorgun.“ Samkvæmt heimildum Fréttablaðsins munu Westlife-piltarnir ætla að gista á 101 Hóteli í miðborg Reykjavíkur, eins og flestar þær stórstjörnur sem hingað koma.

Og þeir fjölmörgu sem héldu að Westlife væri búin að gefa upp öndina þá er það alls ekki raunin. Þeir Nicky Byrne, Kian Egan, Mark Feehily og Shane Filan, sem skipa sveitina, eru nefnilega í fullu fjöri. Sveitin hefur slegið fleiri met en margan grunar, hún er í þriðja sæti yfir þá tónlistarmenn á Bretlandi sem hafa komið flestum smáskífum á toppinn þar í landi, eða alls fjórtán. Aðeins Elvis Presley og Bítlarnir státa af betri árangri. Ný plata Westlife er væntanleg 30. nóvember og hyggst sveitin fylgja henni eftir með miklu tónleikaferðalagi. freyrgigja@frettabladid.is