Hlóðu bálköst í kennslustofu

Piltarnir þrír, allir fimmtán ára, sem kveiktu í Waldorfskóla í Hraunbergi í fyrrakvöld bjuggu til bálköst úr pappír og öðru auðbrennanlegu á gólfi einnar kennslustofunnar, að sögn Snorra Traustasonar, kennara við skólann. Síðan báru þeir eld að kestinum.

Piltarnir höfðu undirbúið það að komast inn í skólann eftir að honum hafði verið lokað. Þeir höfðu sett blað milli starfs og hurðar í kjallara hans þannig að hurðin skall ekki í lás. Íbúi í grennd við skólann varð eldsins var, þegar farið var að skíðloga í kestinum, og lét þegar vita.

Piltarnir þrír voru handteknir skammt frá vettvangi og yfirheyrðir í fyrrinótt, að foreldrum og fulltrúum barnaverndar viðstöddum. Þeir játuðu að hafa kveikt í skólanum, sem var lokaður í gær vegna skemmdanna sem urðu á húsnæðinu. Snorri sagðist gera ráð fyrir að hægt yrði að hefja kennslu í dag eða á morgun. Í grunnskólanum sem um ræðir eru fjörutíu nemendur sem verða án kennslu í einhverja daga, þar á meðal piltarnir þrír.

Snorri segir ekki liggja fyrir hversu mikið tjón hafi hlotist af íkveikjunni, þar sem brunasvæðið hafi verið lokað meðan á rannsókn lögreglu stóð. Þó sé ljóst að það sé mikið.

„Það sést að eldurinn hefur verið mikill í einni stofunni,“ segir hann. „Skemmdir af völdum reyks og sóts voru að auki miklar í tveimur stofum sem eru sitt hvoru megin við þá sem kveikt var í.“

Drengirnir sem um ræðir komu rakleiðis í Waldorfskóla úr Fellaskóla í Breiðholti þar sem þeir höfðu reynt að kveikja í gluggatjöldum. Öryggisvörður varð eldsins var áður en hann náði útbreiðslu.

Samkvæmt upplýsingum Fréttablaðsins var sú skýring sem piltarnir gáfu á framferði sínu sú að þeim hefði þótt þetta spennandi.

Piltarnir eru allir sakhæfir og verður mál þeirra sent ákæruvaldinu að rannsókn lögreglu lokinni. Þeir eiga að auki yfir höfði sér bótakröfu vegna þeirra skemmda sem þeir hafa unnið.

Piltarnir hafa ekki komið við sögu lögreglu áður, en eru nú komnir með sakarferil.

jss@frettabladid.is