The Sunday Mirror: Arsenal hefur áhuga á að fá Bellamy

Arsenal hefur áhuga á því að kaupa framherjann Craig Bellamy frá Manchester City ef marka má frétt í The Sunday Mirror í morgun. Bellamy var ósáttur við brottvikningu Mark Hughes og var síðan á bekknum í fyrsta leiknum undir stjórn Roberto Mancini í gær.

Arsenal er að leita sér að framherja til þess að fylla í skarð Robin van Persie sem verður kannski ekkert meira með á tímabilinu. The Sunday Mirror hefur það eftir ónefndum þjálfara sem hefur unnið með Bellamy að Craig Bellamy sé stríðsmaður og einmitt týpan sem Arsenal þarf á að halda.