Spaugstofan leitar Jóhönnu á Umferðarmiðstöðinni

Spaugstofan fer á fullt á laugardaginn þegar 20. þáttaröðin hefst. Örn Árnason lofar að þeir muni halda uppteknum hætti í allan vetur við að snúa tilverunni á haus.

Tökulið Spaugstofunnar var á BSÍ þegar Fréttablaðið hafði upp á Erni Árnasyni. Þeir voru þá að leita að Jóhönnu Sigurðardóttur forsætis­ráðherra. „Nei, það verða ekki miklar áherslubreytingar, við vinnum bara einn þátt í einu og ætlum að taka hressilega á ástandinu,“ segir Örn en í bakgrunni mátti heyra félaga hans skeggræða um næstu skref.

Örn, Pálmi Gestsson, Karl Ágúst Úlfsson og Sigurður Sigurjónsson hafa í rúma tvo áratugi skemmt landsmönnum á laugardagskvöldum og eftirspurnin eftir hárbeittu gríni þeirra hefur sennilega aldrei verið meiri, allavega eins og staða þjóðmála er um þessar mundir. „Við ætlum bara að reyna að gleðja mann og annan með ömurlegum fréttum,“ segir Örn og hlær. „ Nei, nei, við höldum bara uppteknum hætti og reynum að finna skemmtilega fleti á þjóðmálunum.“ Hann kveðst síður en svo vera kominn með nóg af Spaugstofugríninu en verður ósköp þögull þegar hann er spurður hvort þetta sé síðasta „undirbúnings­tímabil“ hópsins. „Ég veit ekki, ætli það sé ekki bara best að segja sem minnst, það virðist samt alltaf vera þörf fyrir svona fyrirbæri.“

Og fyrst Örn er nú á línunni er ekki úr vegi að spyrja hann hvernig honum lítist á að taka við ritstjórastöðu Morgunblaðsins í Hádegismóum. Enda Örn einhver þekktasta Davíð Oddsson-eftirherma landsins. „Ég verð að fara að leita að kollunni minni, hún er að rykfalla í einhverri kompu, vonandi er allt í lagi með hana; svona ef þetta gengur allt saman eftir eins og menn eru að spá,“ segir Örn.

Að öllu gamni slepptu segir Örn að fyrsti þátturinn verði hefðbundinn Spaugstofuþáttur, engir gestaleikarar heldur bara þeir fjórir. „Þema-þættir og gestirnir koma bara síðar, við ætlum líka bara að spila þetta eftir eyranu.“

freyrgigja@frettabladid.is