Upplausn á stjórnarheimilinu

Steingrímur J. Sigfússon formaður Vinstri grænna gefur ríkisstjórninni ekki langan tíma ef hún finnur ekki ráð eða leiðir út úr þeim vanda sem ríkir í samfélaginu. Hann sagði ljóst að hér á landi yrðu kosningar í síðasta lagi í vor. Hann sagði að allra biði risavaxið verkefni á næstunni. Þetta sagði Steingrímur í viðtali í beinni útsendingu á Rúv.

„Það er upplausn á stjórnarheimilinu og ég gef henni ekki langan tíma," sagði Steingrímur. Hann sagði einnig að staðan í samfélaginu væri að breytast hratt og margt hefði gerst frá áramótum. „Óvissan hefur breyst í gremju og þetta ástand er að magnast og breiðast út um allt land og mótmælafundir eru að magnast."