Unnið að fjórða meirihlutanum í Grindavík - farsakennd bæjarpólitík

Samfylkingin, Vinstrihreyfingin grænt framboð og Sjálfstæðisflokkurinn í Grindavík hittast í kvöld til þess að semja um nýjan meirihluta í bæjarstjórn eftir að VG sleit samstarfinu á föstudaginn síðasta. Þá sendu þeir út tilkynningu þar sem þeir sögðust ekki geta stutt meirihluta Samfylkingar, Framsóknar og VG vegna ágreinings um bæjarstjóra.

VG vildi nýjan bæjarstjóra eftir að Samfylkingarkonan Jóna Kristín Þorvaldsdóttir hætti störfum og fór að vinna sem prestur. Framsóknarmenn vildu aftur á móti ekki nýjan bæjarstjóra en sex mánuðir eru eftir af kjörtímabilinu.

„Við munum funda klukkan átta í kvöld," sagði Hörður Guðbrandsson, bæjarfulltrúi Samfylkingarinnar og forseti bæjarstjórnar. Hann er eini Samfylkingarmaðurinn sem er eftir í bæjarstjórn, en tveir fengu kosningu í síðustu bæjarstjórnarkosningum.

Þetta er í þriðja skiptið sem meirihluti springur í Grindavík en bæjarstjórnarmálin þar hafa verið hálf farsakennd á kjörtímabilinu.

Fyrst slitnaði upp úr samstarfi Samfylkingarinnar og Sjálfstæðisflokksins þegar í ljós kom að umdeildur ráðningasamningur var gerður við þáverandi bæjarstjóra sem var ráðinn til starfanna. Hann fékk meðal annars greitt út kjörtímabilið þrátt fyrir að hafa verið sagt upp og í ofan á lagi keypti bærinn húseign af honum.

Við tók meirihluti Samfylkingarinnar og Framsóknarflokksins. Þá komu upp harðar deilur innan meirihlutans þar sem ráða átti Garðar Pál Vignisson sem skólastjóra í Grindavík og varð ósættið slíkt að Garðar Páll sagði sig úr Samfylkingunni og gekk yfir í VG, sem náðu ekki manni inn í síðustu sveitastjórnakosningum.

Á eftir honum fylgdi Björn Haraldsson, sem var kosinn fyrir hönd Frjálslynda flokksins sem þurrkaði þar með út. VG var óvænt kominn í oddastöðu í bæjarstjórn.

Þá varð staðan enn sérkennilegri því skyndilega var meirihluti Samfylkingar og Framsóknar orðinn minnihluti.

Ný meirihluti var svo myndaður, Framsókn og Samfylkingin héldu meirihluta sem minnihlutastjórn. VG varði svo bæjarstjórnina frá falli - þangað til á föstudaginn þegar óásættanlegur bæjarstjórarígur myndaðist á milli Framsóknar og VG. Vildu forsvarmenn VG að forseti bæjarstjórnar, Hörður Guðbrandsson, tæki við sem bæjarstjóri.

Framsókn vildi þrauka út kjörtímabilið án bæjarstjóra, enda einn þegar á launum. Þess má geta að Jóna Kristín hafnaði biðlaunum.

Nú er svo komið að fjórði meirihlutinn verði myndaður í Grindavík gangi allt að óskum í kvöld.

Ekki náðist í Garðar Pál við vinnslu fréttarinnar.