Með amfetamín í Herjólfi

Átján ára piltur var dæmdur í þriggja mánaða fangelsi fyrir vörslu amfetamíns sem hann var tekinn með um borð í Herjólfi við komuna til Vestmannaeyja í nóvember á síðasta ári. Pilturinn sem varði sig sjálfur játaði brot sitt fyrir dómi. Honum var einnig gert að greiða sakarkostnað upp á rúmlega 75 þúsund krónur.

Maðurinn kom eins og fyrr segir með Herjólfi til Vestmannaeyja að kvöldi mánudagsins 3.nóvember. Þá fundust 37,37 grönn af amfetamíni í snyrtitösku ofan í ferðatösku piltsins.

Við ákvörðun refsingar fyrir brot piltsins var litið til þess magns fíkniefna sem pilturinn játaði að hafa ætlað til sölu og til þess að styrkur efnisins var ekki mikill.

„Ennfremur hefur það áhrif til mildunar að ákærði játaði brot sitt greiðlega, bæði hjá lögreglu og fyrir dómi. Þá gat ákærði þess fyrir dómi að hann hefði farið í meðferð á Vog í tíu daga og væri nú til meðferðar hjá Götusmiðjunni," segir í dómnum.

Eins og fyrr segir var pilturinn dæmdur í þriggja mánað fangelsi en fresta skal fullnustu refsingar og hún niður falla að liðnum tveimur árum frá uppkvaðningu dóms þessa, haldi ákærði almennt skilorð.