Jackson-aðdáendur vilja hjálpa Palla

Eins og kom fram í fjölmiðlum nýverið blæs Páll Óskar Hjálmtýsson til mikillar Michael Jackson-veislu á Nasa í kvöld þar sem hann tekur mörg af þekktustu lögum poppguðsins ásamt Jagúar og þeim Seth Sharp og Alan Jones. Þá mun Yasmine Olsen ásamt fríðum flokki dansara endurskapa bæði Thriller og Smooth Criminal og Páll mun síðan þeyta Jackson-skífum alla nóttina. Allur ágóði tónleikanna rennur til Barnaspítala Hringsins en bæði tónlistarmenn og tæknimenn gefa vinnu sína.

Fréttin um þetta kvöld virðist hafa hreyft við Jackson-aðdáendum um allt Ísland því þeir hafa verið duglegir við að hringja í Páll og bjóða fram aðstoð sína. „Og svo eru margir sem hafa komið með svokölluð „bootlegg“-upptökur og mix sem hafa aldrei heyrst áður,“ segir Páll en „bootlegg“ eru ólöglegar upptökur af tónleikum. Páll hyggst spila þessar upptökur þannig að gestir og gangandi fá að heyra tónlistina á algjörlega nýjum nótum.

Páll er ekki í vafa um að arfleifð Michaels eigi eftir standast tímans tönn og spáir því að hann eigi eftir að verða hæst launaði látni listamaðurinn, slái þar sjálfum Elvis Presley við. „Annars er maður bara uppgefinn eftir æfingarnar með Jagúar, ég verð bara að finna tíma á sunnudaginn til að hvíla mig,“ segir Páll. Veislan hefst klukkan 23.00 og er, eins og áður segir, á Nasa.