Skuldir aukast um 13 milljarða

Verðtryggðar skuldir landsmanna munu hækka um þrettán milljarða króna vegna skattahækkana sem samþykktar voru á Alþingi á mánudag.

Alþingi samþykkti að hækka virðisaukaskatt úr 24,5 prósentum í 25,5 prósent. Auk þess hækka gjöld á áfengi, tóbak, eldsneyti og bíla, eins og fram kom í Fréttablaðinu í gær. Þessar hækkanir hafa bein áhrif á húsnæðislán landsmanna.

Samkvæmt útreikningum ASÍ munu þessar hækkanir leiða til um eins prósenta hækkun á vísitölu neysluverðs, segir Henný Hinz, hagfræðingur hjá ASÍ.

Þetta þýðir einnig að verðtryggð húsnæðislán hækka um eitt prósent.

Höfuðstóll lána landsmanna hækka því um 100 þúsund krónur fyrir hverjar tíu milljónir sem fengnar hafa verið að láni.

Henný tekur fram að ekki sé búið að reikna með ýmsum öðrum verðhækkunum sem mögulegt sé að verði um áramót, til dæmis hjá sveitarfélögunum.

Samkvæmt upplýsingum frá Seðlabankanum námu verðtryggðar skuldir íslenskra heimila um 1.175 milljörðum króna í lok síðasta árs. Nýrri tölur hafa ekki fengist, en sé reiknað með að þær hafi nokkurn veginn fylgt neysluverðsvísitölu má áætla að þær nemi nú um 1.300 milljörðum króna.

Eins prósents hækkun á neysluverðsvísitölu mun hækka þessar skuldir um þrettán milljarða króna. - bj