Seðlabankinn svarar ekki fyrir „einkaflipp“ yfirlögfræðingsins

Ritstjóri Seðlabanka Íslands, Stefán Jóhann Stefánsson, hefur ekki viljað svara vegna álits yfirlögfræðings seðlabankans, sem var kynnt fyrir utanríkismálanefnd og fjárlaganefnd í gær.

Í ljós kom að álitið var alls ekki unnið fyrir Seðlabanka Íslands líkt og nefndarmenn töldu í upphafi heldur var það skoðun yfirlögfræðingsins, sem heitir Sigríður Logadóttir.

Þetta kom fram hjá fréttastofu Ríkisútvarpsins í kvöld auk þess að notast verður við skoðun Sigríðar í áliti Seðlabanka Íslands sem mun verða kynnt á morgun.

Árni Þór Sigurðsson, þingmaður Vinstri grænna og formaður fjárlaganefndar, sagði á Morgunvaktinni á RÚV í morgun að svo virtist sem um einkaflipp lögfræðingsins væri að ræða. Þingmenn telja sig hafa veirð blekkta eða afvegaleidda þegar Sigríður kynnti álitið sem þeir töldu vera á ábyrgð Seðlabankans.

Þá lét Árni þau ummæli falla að svo virtist sem lögfræðingarnir teldu sig enn að störfum fyrir Davíð Oddsson, fyrrum seðlabankastjóra.

Þessi ummæli ollu mikilli úlfúð á þingi þar sem Ólöf Nordal, þingkona Sjálfstæðisflokksins, gagnrýndi Árna harkalega auk Ragnheiðar Elínar Sigurðardóttur þingkonu Sjálfstæðisflokksins á Suðurlandi. Hún heimtaði ennfremur afsökunarbeiðni af hálfu Árna Þórs og spurði hvað þingmaðurinn hygðist gera varðandi allt það uppnám sem fjarvera Davíðs virtist valda.

Henni þótti svo nóg um og sagði: „Á bara að bomba [Seðla]bankann og byrja svo upp á nýtt?"

Engin skýring hefur fengist á því hversvegna Sigríður kynnti álitið sem hefur verið eignað henni persónulega. Sjálf sendi hún Árna Þór skilaboð í gærkvöldi um að álitið endurspeglaði ekki skoðun Seðlabanka Íslands en í Fréttum RÚV í gær var það einnig kynnt með þeim hætti.