Starfhæf stjórn verður að komast á í þessari viku

Guðjón Arnar Kristjánsson formaður Frjálslynda flokksins sagði eftir fund sinn með forseta Íslands á Bessastöðum í kvöld að sér litist betur á þjóðstjórn en minnihlutastjórn Samfylkingar og Vg. Hann sagði að ekki væri hægt að bíða lengur en í 2-3 daga með myndun nýrrar ríkisstjórnar.

Guðjón Arnar ræddi við fjölmiðlamenn að loknum fundinum með forseta. Hann sagði engar formlegar viðræður hafa farið fram meðal forystumanna Frjálslynda flokksins en eitt og annað hefði verið nefnt á síðustu dögum.

Hann sagði Frjálslynda flokkinn telja enn líkt og hann gerði í haust að formenn allra flokka hefðu strax átt að koma hér að málum. Hann sagðist reikna með því að tala við sína menn í kvöld en vildi ekkert gefa uppi um hvort hann ætlaði að ræða við aðra stjórnmálaforingja í kvöld.

Hann sagði ljóst að ábyrgð þingmanna væri mikil og það væri aumingjadómur ef ekki væri hægt að mynda starfhæfa stjórn í landinu og forsetinn þyrfti að mynda utanþingsstjórn. Hann sagði þingmenn ekki getað skorast undan því sem þeir eigi að gera og en ef svo yrði þyrfti forsetinn að höggva á hnútinn.