Hælisleitendur mótmæla við Alþingishúsið

Hópur mótmælenda ætlar frá deginum í dag að taka sér stöðu fyrir framan Alþingi til þess að vekja athygli á stöðu hælisleitenda hér á landi. Flestir þeirra sem ætla að mótmæla eru sjálfir í stöðu hælisleitenda.

Í tilkynningu frá hópnum segir að tilgangur mótmælanna sé að minna valdhafa á tilvist hælisleitenda og bið þeirra. Enn sé beðið eftir svörum frá stjórnvöldum og þeirri „sanngjörnu málsmeðferð" sem hér á að vera að finna. Þá er þess krafist að íslensk stjórnvöld hætti að misnota Dyflinnar-reglugerðina, sem gerir þeim kleyft að senda hælisleitendur kerfisbundið til annarra Evrópulanda, rétt eins og að þar segi að hér sé alls ekkert skjól eða pláss þeim til handa.

„Þrátt fyrir að einstaka reynslusögur hælisleitenda hafi náð athygli fjölmiðla, viljum við einnig minna á að fjöldi fólks bíður enn í Njarðvík, á milli vonar og ótta, eftir því að fá að lifa mannsæmandi lífi. Þetta fólk eyðir stórum hluta ævi sinnar í tímalausu limbói, án þess að geta stigið fæti niður á fasta jörð," segir meðal annars í yfirlýsingu frá hópnum.

Mótmælendurnir benda á að þau lönd sem íslendingar sendi hælisleitendur einna helst til séu þéttsetin af þúsundum hælisleitenda og þessvegna er þess krafist að íslensk stjórnvöld sýni þá ábyrgð sem þau hafa þegar skrifað undir, með því að virða mannréttindi og sýna mannúðlegri meðferðir.