Hart barist gegn sorpinu

Tillaga Umhverfis­stofnunar um framlengt starfsleyfi Sorpstöðvar Suðurlands, sem kveður á um að sorp verði urðað í landi Kirkjuferjuhjáleigu næstu sextán árin, hefur vakið harða andstöðu íbúa í nágrenni stöðvarinnar. Umrædd tillaga var kynnt á borgarafundi fyrr í vikunni.

Íbúar segja gildandi deiliskipulag hafa verið þverbrotið á þeim tíma sem sorpstöðin hefur verið starfrækt á staðnum.

„Þeir voru búnir að teikna nýtt skipulag þar sem gert var ráð fyrir að urðunarhaugarnir yrðu umtalsvert hærri en gildandi deiliskipulag kvað á um. Samþykkt hæð í skipulaginu var fjórir metrar yfir landhæð og metri í þekjulag þar sem hæst væri. Nú eru haugarnir komnir í að minnsta kosti tíu metra hæð yfir landhæð. Þetta nýja skipulag var því eins og að fá leyfi fyrir að byggja einbýlishús, byggja svo blokk, teikna hana að byggingu lokinni og fá svo teikningarnar samþykktar,“ segir Kristbjörg Eyvindsdóttir í Auðsholtshjáleigu sem er í nágrenni urðunarstaðarins.

Kristbjörg kærði til úrskurðar­nefndar skipulagsmála, sem felldi úr gildi hið nýja deiliskipulag bæjarstjórnarinnar þar sem ekki mætti byggja það á deiliskipulagi sem þegar hefði verið brotið nema að uppfylltum vissum skilyrðum.

Sveitarfélagið hafði samþykkt að urðun á staðnum yrði hætt 1. desember 2008. Síðan var veitt eins árs undanþága. Tillagan um framlengt starfsleyfi sem kynnt var á borgarafundinum nú í vikunni kom því eins og þruma úr heiðskíru lofti. Samkvæmt því má urða þrjátíu þúsund tonn af sorpi á ári, samtals 480 þúsund tonn á sextán árum.

„Deiliskipulagið frá 1993, sem sorpstöðin á að starfa eftir, en reyndar er búið að þverbrjóta, rúmar ekki einu sinni það magn sem þegar er búið að setja á svæðið, hvað þá 480 þúsund tonn til viðbótar,“ segir Kristbjörg.

„Það er með ólíkindum að Umhverfisstofnun ætli sér að setja starfsleyfi á starfsemi sem hefur enga möguleika á að taka við þessu magni.“

Kristbjörg segir mikla sjón- og lyktarmengun, auk foks frá urðunar­staðnum, sem er á bökkum Ölfusár, auk þess sem vatnasvæði sé upp í Sogið og Hvítá. Rannsóknir á áhrifum mengunar séu engar. Ekki hafi farið fram tilskilið umhverfismat áður en starfsemin hófst. jss@frettabladid.is