Kylfur á lofti annan dag í röð

Annan daginn í röð sá lögregla ástæðu til að draga upp kylfur; Í dag þegar gert var hróp að forsætisráðherra við stjórnarráðið. Þúsundir hafa mótmælt ríkisstjórninni í miðborginni nánast sleitulaust frá því á hádegi í gær.

Þrátt fyrir mannfjöldann, örþreytta lögregluþjóna og reiðina sem ólgaði í miðborginni í dag kom ekki til jafn harkalegra átaka og við mótmælin í gær, þegar bæði mótmælendur og lögregla hlutu áverka.

Hundar góluðu í takt við bumbusláttinn og slagorðið vanhæf ríkisstjórn sem hljómað hefur í allan dag. Aðrir sváfu.

Eins og hendi væri veifað tæmdist Austurvöllur þegar fréttist að Geir Haarde forsætisráðherra væri í Stjórnarráðinu. Þegar hundruðir mótmælenda mættu þangað var forsætisráðherra í þann mund að yfirgefa húsið. Með aðstoð lögreglu komst hann í bíl sinn og var ekið í burtu. Andrúmsloftið var rafmagnað, návígi mótmælenda við forsætisráðherra mikið og lögregla hélt um kylfur sínar viðbúin hverju sem verða vildi. Nokkur egg lentu á bifreiðinni en annars voru slagorð og bumbusláttur látinn nægja.

Óeirðarlögregla sem raðaði sér upp fyrir framan stjórnarráðið fékk svo yfir sig gusurnar og máttu sjá á einkennisklæðnaði þeirra að ekki vannst tími til að þrífa þá eftir atganginn í gær.

Og aftur lá leiðin niður á Austurvöll þar sem bumbuslátturinn og slagorðin þögnuðu vegna jarðafarar sem fram fór í Dómkirkjunni.

Og svo hélt pattstaðan áfram þar sem óeirðarlögregla stóð í röð og fólkið kastaði matvælum í átt að þeim og Alþingishúsinu, tákngervingi stjórnvalda. Hvort heldur rætt var við lögreglu eða mótmælendur voru menn sammála um að tímaspursmál sé hvenær upp úr sjóði og ástandið verði stórnlaust.