Undirbýr lög um Eftirlitsstofnun heilbrigðisþjónustu

Guðlaugur Þór Þórðarson, heilbrigðisráðherra, hefur sent út frumvarpsdrög til umsagnar þar sem gert er ráð fyrir að breyta í grundvallaratriðum hlutverki og skipulagi eftirlits- og forvarnastofnana sem ríkið rekur.

Samkvæmt frumvarpsdrögunum er gert ráð fyrir að ný stofnun, Eftirlitsstofnun heilbrigðisþjónustu, verði sett á fót til að taka við verkefnum frá Lyfjastofnun og verkefnum landlæknis er varða eftirlitshlutverk embættisins. Með lögunum yrði landlæknisembættið, það er að segja eftirlitsþáttur starfseminnar, Lyfjastofnun og lyfjagreiðslunefnd sameinuð í eina stofnun. Hugmyndin er að byggja með þessu upp eina öfluga eftirlits- og stjórnsýslustofnun sem falið yrði að hafa eftirlit með öllum þáttum er snúa að heilbrigðisþjónustunni.

Segir heilbrigðisráðherra að ætla mætti að með þessu fyrirkomulagi nýttist sérhæfing betur og að með þessu yrði til skilvirkari stjórnsýslu og samhæfðara eftirlit með fjölbreyttum þáttum heilbrigðisþjónustunnar.