Norrænir stjórnmálamenn gagnrýna áformaðar hvalveiðar harðlega

Ákvörðun Íslendinga um að auka hvalveiðikvótann var gagnrýnd harðlega á fundi Norðurlandaráðs sem haldin er á Íslandi þessa dagana. Meðal annars er það tímasetning ákvörðunar um aukinn kvóta sem vekur athygli, ekki síst vegna fjármálakreppunnar. Þá er það gagnrýnt að ríkisstjórnin hafi samþykkt aukinn kvóta, daginn eftir að tilkynnt hafi verið að hún segði af sér, eftir því sem fram kemur á vef Norðurlandaráðs.

„Hvalveiðar eru umdeildar bæði á Norðurlöndum og í heiminum öllum. Það er undarlegt að ríkisstjórn Íslands skuli ákveða að undirrita svo umdeildan samning í miðri fjármála- og stjórnarkreppu. Í slíkri pólitískri ringulreið ætti ekki að ræða mál sem þetta," segir Sinikka Bohlin, þingmaður frá Svíþjóð og forseti Norðurlandaráðs.

Fundur Norðurlandaráðs er haldinn á Íslandi þessa dagana. Svíþjóð fer með formennsku í Norðurlandaráði sem er opinber samstarfsvettvangur þingmanna Norðurlandanna. Norræna ráðherranefndin, það er að segja samstarfsvettvangur ríkisstjórna Norðurlandanna hefur ekki tekið afstöðu til hvalveiða á Norðurlöndum. Um annað spendýr sem lifir í vatni, selinn, hefur þó verið mikið fjallað, meðal annars í ríkisstjórnum Norðurlandanna.