Skrifstofum Ferðamálastofu erlendis lokað

Skrifstofu Ferðamálastofu í Kaupmannahöfn verður lokað og starfsmönnum hennar sagt upp, eftir því sem kemur fram á danska ferðamálavefnum Standby.dk.

Samkvæmt heimildum vefsins verður öllum skrifstofum ferðamálastofu á erlendri grund lokað. Skrifstofunni í Kaupmannahöfn á að loka í seinasta lagi í apríl.

Á vefnum segir að engar upplýsingar sé hægt að fá um málið hjá yfirmanni skrifstofunnar í Kaupmannahöfn né í höfuðstöðvunum á Íslandi. Tilkynning um lokanirnar sé væntanleg í fyrsta lagi á mánudag. Blaðamenn Standby benda á að síðast í nóvember hafi stjórnvöld á Íslandi fullyrt í dönskum fjölmiðlum að mikill kraftur yrði lagður í að fjölga ferðamönnum til landsins. Enda sé ferðaiðnaðurinn í dag ein aðaluppspretta erlends gjaldeyris fyrir landið.