Mótmælunum lokið - sex handteknir

Mótmælum við Hilton Nordica hótelið við Suðurlandsbraut er lokið en þar fór fram opnunarmóttaka fyrir gesti NATO málstofu sem fer fram hér á landi. Samkvæmt upplýsingum frá lögreglu voru um 50 til 60 mótmælendur á svæðinu en alls voru sex handteknir.

Piparúða var beitt en lögregla segir það hafa veri eitt einangrað tilfelli þar sem úðanum var beitt gegn einum einstaklingi.

Nokkur fjöldi lögregluþjóna var á svæðinu og að sögn sjónarvotta var mikil öryggisgæsla við hótelið. Þeir handteknu hlýddu ekki fyrirmælum að sögn lögreglu.

Fólkið lét vel í sér heyra og barði potta og pönnur og veifaði kunnuglegum skiltum á borð við, Ísland úr NATO og herinn burt.