Steingrímur fundar með Ingibjörgu

Steingrímur J. Sigfússon formaður Vinstri grænna fór fyrir skömmu af stjórnarmyndunarfundinum í Alþingishúsinu. Hann fór að hitta Ingibjörgu Sólrúnu Gísladóttur formann Samfylkingarinnar en hún hefur verið fjarverandi í dag.

Steingrímur sagði við fréttamenn þegar hann kom út að góður gangur væri í viðræðunum og að engin sérstök vandamál hafi komið upp á.

Jóhanna Sigurðardóttir félagsmálaráðherra og væntanlegur forsætisráðherra hefur stýrt fundinum í dag og er búist við að hún gefi yfirlýsingu um gang mála innan tíðar.

Ásgeir Jónsson, forstöðumaður Greiningadeildar Kaupþings, og Yngvi Örn Kristinsson, sérfræðingur hjá Landsbanka Íslands, hafa báðir verið ríkisstjórninni til ráðgjafar í dag. Þeir fulltrúar í samninganefndinni sem fréttastofa Stöðvar 2 og Vísis hefur rætt við segjast finna glöggt fyrir því að þeir hafi enga óháða stofnun til að leita til. Erfitt sé að leita til Seðlabanka eða fjármálaráðuneytisins. Það vanti klárlega þjóðhagsstofnun.