Segir gagnrýni Össurar furðulega

Björn Bjarnason fráfarandi dóms- og kirkjumálaráðherra undrast gagnrýni Össurar Skarphéðinssonar vegna ákvörðunar Einars K. Guðfinnssonar fráfarandi sjávarútvegsráðherra.

Einar Kristinn gaf út veiðiheimildir fyrir hrefnur og langreyðar til næstu fimm ára í gær. Björn segir á heimasíðu sinni að furðulegt sé að heyra Össur Skarphéðinsson gagnrýna ákvörðun Einars, þar sem hún hafi ekki verið borin upp í ríkisstjórn.

„Ég man ekki betur en á sínum tíma hafi Ingibjörg Sólrún sagt eitthvað á þá leið, að útgáfa reglugerðar um hvalveiðar væri stjórnarathöfn, sem sjávarútvegsráðherra tæki einn og án tilstuðlan ríkisstjórnar," skrifar Björn á heimasíðu sína.