Kyrrsetning eigna stangast á við stjórnarskrá

„Ég held að ef að það eigi að fara í einhverjar svona aðgerðir að þá þurfi það náttúrulega að vera löglegt. Eins og þetta er sett fram núna að þá held ég að það brjóti í bága við stjórnarskrána," segir Höskuldur Þórhallsson, lögfræðingur og þingmaður Framsóknarflokksins. VG hefur sett fram þær hugmyndir að eignir auðmanna verði kyrrsettar. Höskuldur telur þessa hugmynd ekki ganga upp en leggur jafnframt áherslu á að strax eftir bankahrunið hefði þurft að fara af stað rannsókn á öllum þeim misferlum sem kunna að hafa átt sér stað í bankakerfinu. „Ég harma seinagang og doða fyrrverandi ríkisstjórnar í þeim efnum," segir Höskuldur.

„Þessi stjórn sem við ætlum að verja falli á að starfa stutt og á að vera með fá mál en góð. Það verður að koma atvinnulífinu á skrið og gera eitthvað til að bjarga heimilunum," segir Höskuldur. Hann segir að að stjórnarsamstarfið megi alls ekki snúast um einhver kosningamál Vinstri grænna. Málefni eins og að segja upp Seðlabankastjórunum, breyta eftirlaunalögum embættismanna og að setja á fót stjórnlagaþing séu allt góð mál sem framsóknarmenn muni styðja.