Jóhanna stýrir fyrsta ríkisstjórnarfundi

Fyrsti fundur ríkisstjórnar Samfylkingarinnar og Vinstri grænna hófst í Stjórnarráðinu við Lækjartorg klukkan hálftíu í morgun. Þetta var jafnframt fyrsti ríkisstjórnarfundurinn þar sem Jóhanna Sigurðardóttir er í forsæti við enda fundarborðs ríkisstjórnarinnar.

Allir tíu ráðherrarnir voru mættir. Jóhönnu á hægri hönd sat Steingrímur J. Sigfússon fjármálaráðherra en á vinstri hönd Össur Skarphéðinsson utanríkisráðherra.

Gamlar venjur og hefðir ráða sætaskipan við ríkisstjórnarborðið, samkvæmt upplýsingum úr forsætisráðuneytinu. Næst forsætisráðherra sitja flokksformenn en þar næst þeir ráðherrar sem lengstan starfsaldur hafa. Séu þeir jafnir ræður starfsaldur á Alþingi. Í tilviki nýrra ráðherra án þingreynslu ræður lífaldur. Samkvæmt þessu sátu þau Gylfi Magnússon og Ragna Árnadóttir fjærst forsætisráðherra.

Forystumenn ríkisstjórnarinnar, þau Jóhanna Sigurðardóttir og Steingrímur J. Sigfússon, hafa boðað til blaðamannafundar kl. 11.30 þar sem búist er við að fyrstu ákvarðanir ríkisstjórnarinnar verði kynntar.