Ragnhildur í spjallþætti Tom Green þegar Jackson dó

Kanadíski spéfuglinn, þáttastjórnandinn og tónlistarmaðurinn Tom Green er þekktur fyrir flest annað en lognmollu eins og þeir vita mætavel sem fylgdust með þáttum hans á MTV hér áður fyrr og nú þættinum Tom Green´s House Tonight sem sendur er út á Netinu.

Færri vita hins vegar að nú á allra síðustu dögum hafa ekki færri en tveir Íslendingar verið gestir í þætti Kanadamannsins geðþekka. Annars vegar var þar um að ræða Guðjón Ólafsson leikstjóra, sem unnið hefur í Los Angeles um árabil. Guðjón er maður uppátækjasamur og tók upp á því að hringja í Ragnhildi Magnúsdóttur, útvarpskonu á Bylgjunni, í miðjum þætti og leyfa Tom að heyra í henni hljóðið.

Þáttastjórnandinn skemmti sér svo vel að hann bauð Ragnhildi að líta inn í eins og einn þátt ætti hún leið um hina sólríku en gjaldþrota Kaliforníu. Ragnhildur á fjölskyldu í ríkinu og var þar einmitt á ferð í síðustu viku. Fór svo að hún þekktist boð Green og spjallaði við hann í heilan klukkutíma í þættinum síðastliðinn fimmtudag.

Green er gamansamur með afbrigðum og hefur munninn fyrir neðan nefið en hans helsta áhugamál er að slá gesti sína út af laginu og ganga helst alveg fram af þeim. Ragnhildur fékk því að reyna allan Íslandshúmorinn eins og hann horfir við bandarísku þjóðinni. Ísbirnir, handbolti, tónlistarmenningin hér á Fróninu og fleira og fleira. Ragnhildur lét þó ekki vaða yfir sig enda vön útvarpskona auk þess sem enskan er hennar annað móðurmál.

Green varð tíðrætt um að þyrlur svifu í gríð og erg yfir miðborginni meðan á þættinum stóð og kannski engin furða enda kom það í ljós skömmu eftir útsendingu að poppgoðið Michael Jackson hafði fallið frá á sviplegan hátt einmitt í miðjum þættinum. Vísir greindi í gær frá samsæriskenningum sem meðal annars gengu út á að forseti Írans hefði látið myrða Jackson. Er þá ekki hægt að trúa því að allt geti gerst þegar tveir Íslendingar lenda í spjallþætti hjá Tom Green með örstuttu millibili og Michael Jackson gefur upp öndina á meðan annað þeirra stendur sem hæst?