Drakk stíflueyði og lést eftir líkamsárás

Karlmaður og kona voru flutt á gjörgæsludeild Landspítalans eftir líkamsárás í Hörðalandi í Fossvogi snemma í gærmorgun. Karlmaðurinn lést síðdegis í gær og konan var enn í öndunarvél þegar blaðið fór í prentun. Hún var þó ekki talin í lífshættu.

Konan hlaut þung höfuðhögg og skurði á höfði. Maðurinn er talinn hafa drukkið stíflueyði, eða annan álíka ætandi lög, eftir að hann hafði veitt konunni áverkana.

Eftir því sem Fréttablaðið kemst næst höfðu maðurinn og konan verið gift, en voru nýskilin. Hann hafði nýverið misst atvinnuna. Þau eiga saman tvö ung börn.

Maðurinn var fluttur að heiman en hafði komið heim til konunnar um morguninn til þess að sækja börnin og fara með þau á leikskóla. Eftir að því var lokið sneri hann aftur í Hörðaland, þar sem harmleikurinn átti sér síðan stað. Það var svo rétt fyrir klukkan hálfníu í gærmorgun sem maðurinn hringdi í lögregluna. Hann kvaðst hafa valdið konunni miklum skaða, jafnvel svo miklum að hún væri látin. Að því búnu sleit hann símtalinu.

Lögreglumenn úr umferðardeild, sem voru á bifhjólum í nágrenni við Hörðaland, fóru þegar á staðinn, svo og þrír lögreglubílar og fjórir sjúkrabílar. Fleiri bílar frá lögreglu og sjúkraliði bættust svo við þegar ljóst varð að harmleikur hefði átt sér stað í íbúðinni sem hefði leitt til þess að fólkið inni væri talið í lífshættu. Að auki komu lögreglumenn úr tækni- og rannsóknardeild fljótlega á staðinn.

Maðurinn og konan voru flutt á Landspítalann í Fossvogi þar sem þeim var haldið sofandi í öndunarvélum í gær. Innanmein mannsins drógu hann til dauða nokkrum klukkustundum síðar. Konan gekkst undir aðgerð á höfði og jafnframt þurfti að sauma skurði sem hún hafði hlotið.

Auk þess sem lögregla rannsakaði vettvang í gær var rætt við vitni, sem kynnu að geta gefið einhverjar upplýsingar.

Maðurinn, sem var fæddur árið 1971, hafði verið búsettur hér um árabil og var íslenskur ríkis­borgari. Konan er fædd 1966.

jss@frettabladid.is