Kapphlaup við tímann að hefja bólusetninguna

Sóttvarnalæknir segir það kapphlaup við tímann af hefja bólusetningu til að hefta útbreiðslu svínaflensunnar. Hún hefur sótt í sig veðrið á höfuðborgarsvæðinu og hafa níu manns verið lagðir inn á sjúkrahús síðustu vikur, þar af tveir á gjörgæslu.

Talið var að inflúensa H1N1 - sem jafnan er nefnd svínaflensa - væri í rénun, en annað hefur komið á daginn.

„Það sem við erum að sjá er að faraldurinn er að sækja í sig veðrið á höfuðborgarsvæðinu. Við sjáum það ekki enn á landsbyggðinni, en tilfellum fer fjölgandi eftir að þeim fór fækkandi um hríð," segir Haraldur Briem sóttvarnarlæknir.

Flensan sækir nú á af nokkrum þunga og hafa níu manns verið lagðir inn á sjúkrahús frá því í byrjun september, þar af tveir á gjörgæslu. Allt er þetta fólk með aðra undirliggjandi sjúkdóma, en það er einmitt hópurinn sem er í forgangi þegar bólusetning hefst í byrjun nóvember. Bólusetningin fer seinna af stað en ætlað var, þar sem töf varð á afgreiðslu lyfjanna. Reynt verður að ná til sem flestra landsmanna, en litið er á heimsfaraldur inflúensu sem grafalvarlegt mál.

„Það þarf bara að passa upp á að fólk veikist ekki hastarlega. Við höfum ennþá inflúensulyfin sem við getum gefið. En svo er það auðvitað kapphlaup við tímann að hefja bólusetningar og bagalegt að það hefur tafist að við fáum þetta en við vonum hið besta."

Bólusetning mun fara fram á heilsugæslustöðvum í landinu, Landspítala og sjúkrahúsinu á Akureyri og er vonast til að henni verði lokið síðla í janúar á næsta ári.