Öryrkjabandalagið óskar eftir frestun

Stjórn Öryrkjabandalags Íslands ætlar óska eftir því að fyrirhuguðum skerðingum á örorkulífeyri sem taka eiga gildi um næstu mánaðamót verði frestað.

Greiðslur til tæplega 2000 örorkulífeyrisþega skerðast um næstu mánaðamót. Þetta er í samræmi við árlega endurskoðun tíu lífeyrissjóða á tekjum örorkulífeyrisþega.

Gangi þetta í gegn stöðvast alfarið örorkugreiðslur til 700 einstaklinga og þá lækka greiðslur um allt að 30 prósent hjá 1200 einstaklingum til viðbótar.

Halldór Sævar Guðbergsson, formaður Öryrkjabandalags Íslands, segir eðlilegt að lífeyrissjóðirnir endurskoði þessa áætlun en stjórn bandalagsins mun funda um málið á næstu dögum.

„Ég og Öryrkjabandalagið er mjög óhress með þessar aðgerðir. Hér er um endurútreikninga að ræða en við hjá Öryrkjabandalaginu erum að reka mál fyrir dómstólum vegna þess að lífeyrissjóðir, og meðal annars lífeyrissjóðurinn Gildi, breytti samþykkt og við unnum málið fyrir héraðsdómi. Það fer fyrir Hæstarétt í lok nóvember og mér finnst að lífeyrissjóðirnir ættu að bíða eftir þeirri niðurstöðu áður en að þessir endurútreikningar kæmu," segir Halldór.

Halldór segir nú þegar verulega þrengt að örorkulífeyrisþegum. „Það er bæði verið að skerða í almannatryggingakerfinu og hjá lífeyrissjóðunum auk þess að það er verið að skerða ýmsa þjónustu og hækka ýmis gjöld eins og komugjöld til lækna og sjúkraþjálfara og lyfjakostnaðinn."