Lífeyrisgreiðslur skerðast

Greiðslur til tæplega tvöþúsund örorkulífeyrisþega skerðast um næstu mánaðarmót. Lífeyrisþegi hjá Gildi er ósáttur við að fá fjórðungi minna en áður. Framkvæmdastjóri lífeyrissjóðsins segir árlega tekjuskoðun skýra skerðinguna.

Greiðslustofa lífeyrissjóða sendi alls 2100 manns bréf í gær frá tíu lífeyrissjóðum. Halldór Sævar Guðbergsson, formaður Öryrkjabandalagsins, sagði í samtali við fréttastofu í dag að hjá 700 manns verði greiðslur stöðvaðar, þær verði lækkaðar um allt að 30% hjá um 1200 manns en hækkaðar hjá 200.

Þórir Karl Jónasson er einn þeirra sem fékk boð um skerðingu í gær, en bréfið var sent fyrir hönd Gildi lífeyrissjóðs. Þar segir að samkvæmt samanburði á tekjum hans fyrir og eftir orkutap breytist greiðslurnar frá sjóðnum vegna örorku úr rúmum 97 þúsund krónum á mánuði í 76 þúsund krónur, eða um rúm 20%. Breytingin taki gildi í nóvember.

Þórir segir að Gildi hafi ekki gefið skýringar á því hvers vegna þetta gerist. „Nei, en þetta er náttúrulega heimilað samkvæmt lögum frá Alþingi um síðustu áramótum þegar Jóhanna Sigurðardóttir var félagsmálaráðherra. Það er ekki búið afnema það ennþá."

Heimilað sé að lækka lífeyrisgreiðslur og þær þurfa ekki að vera í takti við framfærsluvísitölu. Þórir segir óljóst hvort að gripið verði til aðgerða vegna þessa.

Árni Guðmundsson, framkvæmdastjóri Gildis, sagði í samtali við fréttastofu í dag að um væri að ræða árlega tekjuskoðun örorkulífeyrisþega. Samkvæmt reglum sjóðsins megi sjóðfélagi ekki hafa hærri greiðslur eftir örorku en hann hafði áður.

Árni segir að ef örorkulífeyrir skerðist sé það eingöngu vegna þess að tekjur lífeyrisþegans séu orðnar hærri en reglurnar segi til um. Skerðingin hafi því ekkert með stöðu lífeyrissjóðsins að gera enda hækki greiðslur sumra.