Háskólasjóður rýrnaði um þriðjung

Háskólasjóður Eimskipafélags Íslands rýrnaði um þriðjung í bankahruninu. Sjóðurinn var stofnaður árið 1964 og er honum ætlað stuðla að velgengni Háskóla íslands og styrkja efnilega stúdenta til náms. Í honum voru rétt rúmir þrír milljarðar í september  síðastliðnum en nú eru í honum rúmir tveir milljarðar.

Sjóðurinn var stofnaður til minningar um Vestur-Íslendinga sem hlut áttu í stofnun Eimskipafélagsins. Stofneign sjóðsins voru hlutabréf í Eimskipafélaginu  allt til ársins 2005 þegar Björgólfur Guðmundsson, sem þá var orðinn aðaleigandi Eimskips, gerði samning við Háskólann um að Landsbankinn tæki sjóðinn í sína vörslu og ávaxtaði hann.

Þá voru eignir sjóðsins metnar á um tvo milljarða. Sjóðurinn óx jafnt og þétt í vörslu Landsbankans árin 2006 og 2007 og fyrri hluta árs 2008 og var þá orðinn 3250 milljónir þrátt fyrir að hafa veitt um 700 milljónum í styrki og verkefni á vegum háskólans.

Sjóðurinn tók á sig mikið högg í bankahruninu og rýrnaði um meira en þriðjung. Aðallega vegna taps á peningamarkaðsbréfum Landsbankans. Sjóðurinn er nú um tveir milljarðar. Og tapið fyrir Háskólann því einn milljarður króna.

Það er stjórn Háskólasjóðs Eimskipafélagsins sem ber ábyrgð á fjárfestingastefnu hans. Í stjórninni sitja þeir Björgólfur Guðmundsson, Halldór J. Kristjánsson fyrrverandi bankastjóri í Landsbankanum og Kjartan Gunnarsson fyrrverandi framkvæmdastjóri Sjálfstæðisflokksins og bankaráðsmaður í Landsbankanum.