Tvær lúxusíbúðir Baugs til sölu - myndir

Tvær lúxusíbúðir í Lundúnaborg sem nú eru á forræði skiptastjóra þrotabús Baugs eru í sölumeðferð. Verðmæti þeirra er um tveir og hálfur milljarður.

Íbúðirnar eru báðar við Trevor Square í Knightsbridge, einu dýrasta hverfi Lundúnar. Trevor Square er í göngufæri frá Hyde Park og Sloane Street, einni helstu hátískuverslunargötu Lundúnaborgar. Íbúðirnar voru báðar í eigu Baugs en voru seldar til Gaums til að gera upp skuld rétt fyrir þrot Baugs. Bæði Gaumur og Baugur eru að stórum hluta í eigu Jóns Ásgeirs Jóhannessonar og fjölskyldu hans.

Í sölusamningnum var ákvæði um að kaupin gætu gengið tilbaka á 6 mánuðum og Baugur gæti breytt andvirðinu aftur í lán. Það gerði skiptastjóri þrotabús Baugs setti íbúðirnar á sölu hjá fasteignasölunni Harrods Estate.

Ásett verð á íbúðirnar tvær er um 2 og hálfur milljarður íslenskra króna. Ein íbúðin hefur verið í útleigu en Jón Ásgeir hefur haft afnot af hinni. Sú er rúmir 200 fermetrar og er þriggja herbergja. Úr borðstofunni er útgengi út á þakverönd sem snýr í vestur og er með útsýni yfir Knightsbridge. Íbúðin er í nútímalegum stíl og hefur aðgengi að bílastæði. Í byggingunni, sem áður var nýtt sem geymsla fyrir Harrods, eru 40 íbúðir. Allar eru þær með loftkælingu og innbyggðu afþreyingarkerfi. Húsvörður er í húsinu allan sólarhringinn og öryggiskerfi.

Samkvæmt heimildum fréttastofu standa vonir til að íbúðirnar seljist á næstu vikum, en einn kaupandi hefur lýst yfir áhuga.

Þess ber að geta að Jón Ásgeir er aðaleigandi 365 miðla sem rekur meðal annars Stöð 2 og Visir.is.

Myndir innan úr annarri íbúðinni má sjá með því að smella hér.