Flugþjónn gerir stuttmynd og slær í gegn

„Ég er lærður leikari en er búinn að fljúga lengi. Mér fannst ég kominn á þann stað í lífinu að ég þyrfti að fara að skapa eitthvað,“ segir flugþjónninn Barði Guðmundsson. Stuttmynd hans, Mamma veit hvað hún syngur, verður sýnd á Riff-hátíðinni seinna í mánuðinum. „Ég skrifaði handritið á löngum flugum, oft á næturflugi til Alicante. Þá var stundum lítið að gera. Ég er yfirmaður svo ég lét það ekki trufla þótt kúnnarnir þyrftu aðstoð. Sendi bara hina,“ segir hann í gríni.

Þetta er grínmynd, 24 mínútna löng. Hún fjallar um Guðna Geir (Víðir Guðmundsson) sem býr heima hjá mömmu sinni. „Helga Braga leikur mömmuna og ég hafði hana alltaf í huga þegar ég skrifaði handritið. Hún er ráðrík og eyðileggur allar tilraunir sonarins til ástarsambanda. Hún er svo hrædd um að missa hann að heiman.“

Mamma veit hvað hún syngur – Mama knows best á ensku – var frumsýnd í San Francisco í júní, á alþjóðlegri kvikmyndahátíð samkyn­hneigðra. „Myndin var sýnd í Castro-bíóinu í troðfullum 1.500 manna sal. Viðtökurnar voru satt að segja rosalega góðar. Eftir myndina var fyrirspurnartími og þar var aðallega spurt um Helgu Brögu, hvar ég hefði eiginlega náð í svona stórkostlega leikkonu. Ég held að Helga Braga sé hreinlega orðin heimsfræg í San Francisco.“

Tilboðum rigndi inn eftir San Francisco-hátíðina og nú er myndin bókuð á fjölda kvikmyndahátíða, meðal annars í Osló, Hamborg og Palm Springs. „Ég fylgi nú ekki sjálfkrafa með á þær allar, en kannski kíkir maður á einhverjar. Ég er nú einu sinni að vinna hjá flugfélagi,“ segir leikstjórinn og hlær.

Framleiðandi myndarinnar er Hrafnhildur Gunnarsdóttir og myndin verður sýnd nokkrum sinnum á Riff, í fyrsta skipti 19. september í Háskólabíói.- drg