Ólafur Darri orðheppnastur

Lokahóf leikaraboltans svokallaða var haldið á Catalinu í Kópavogi, annan í hvítasunnu. Fögnuðu leikarar þar góðu ári í Fífunni þar sem þeir etja kappi í fótbolta, stundum eftir leikhúsum.

„Ég skoraði þrennu," segir Bergur Þór Ingólfsson, leikari ánægður. „Það voru engin ákveðin lið, heldur voru menn bara svartir á móti ljósum treyjum."

Eftir góðan leik tók við fögnuður á Catalinu sem Björn Thors stýrði. Veitt voru verðlaun í ýmsum flokkum, Stefán Hallur Stefánsson var valinn markaskorari ársins en Ólafur Egilsson þótti taka mestum framförum.

„Við verðlaunaathöfnina sagðist hann hafa byrjað á því að reyna að vera ekki fyrir en endað á að skora næstum mark. Næstum," segir Bergur.

Þá fékk Björn Thors verðlaun sem markahæsti varnarmaðurinn, Ingvar E. Sigurðsson var valinn smekklegasti leikmaðurinn en Ólafur Darri Ólafsson sá orðheppnasti.

Um kvöldið sá svo Hjálmar Hjálmarsson um hljómsveitarstjórn en mönnum var boðin frjáls þátttaka í bandinu og gripu margir í hljóðfæri, þar á meðal Vignir Rafn Valþórsson sem fór á kostum á rafmagnstrommusettinu. - kbs