Samfylkingin boðar til framtíðarþings

Samfylkingin býður til opinnar hugmyndasmiðju þar sem horft verður til framtíðar. Framtíðarþingið markar upphafið á lokahnykk stefnumótunar sem mun ná hámarki á landsfundi Samfylkingarinnar í næsta mánuði.

Á þinginu verður fjallað um hvernig tekist verður á við brýnustu verkefni samfélagsins á grundvelli þeirra gilda, verkefna og áherslna sem eiga að ráða för við endurreisn íslensks samfélags í kjölfar bankahrunsins, að fram kemur í tilkynningu frá flokknum.

 

„Áherslan verður lögð á virka þátttöku flokksmanna og annarra sem áhuga hafa á að leiða fram nýjar hugmyndir og lausnir. Framtíðarþing Samfylkingarinnar á að vera staður  fyrir frjó skoðanaskipti og vettvangur fyrir skapandi stjórnmál. Vinnan fer fram í hópum en engin framsöguerindi verða á þinginu,“ segir í tilkynningunni.  

Niðurstöður Framtíðarþings fara í framhaldinu til umfjöllunar í málefnanefndum Samfylkingarinnar fram að landsfundi.

Framtíðarþingið er haldið í Hressingarskálanum við Austurstræti og hefst kl. 10 árdegis laugardaginn 7. febrúar.