Katrín um launamál Rúv: Vel í lagt hjá efstu mönnum

Katrín Jakobsdóttir menntamálaráðherra segir að vinna sé þegar hafin við endurskoðun á þjónustusamningi við Rúv og meðal annars sé verið að skoða launauppbygginguna innan félagsins. Í árshlutauppgjöri Rúv frá 1.september til loka febrúar á þessu ári kemur fram að tap félagsins sé rúmar 365 milljónir króna. Páll Magnússon útvarpsstjóri fær rúma 1,5 milljón króna á mánuði. Katrin segir vel í lagt hjá efstu mönnum.

„Það er vinna í gangi núna eftir að við skrifuðum undir samning um að auka eigið fé Rúv þann 22.apríl. Við það varð eiginfjárstaðan jákvæð aftur en partur af því er að endurskoða þjónustusamninginn við Rúv, endurskoða samþykktirnar og launauppbygginguna innan félagsins," segir Katrín.

„Það eru náttúrulega allir búnir að taka á sig launalækkun en það er vel í lagt þarna hjá efstu mönnum. Það er eitthvað sem við munum vinna í og ná samkomulagi við Rúv um."

Aðspurð um tap Rúv sem er um 60 milljónir á mánuði segir Katrín fjármagnskostnaðinn vera stærsta liðinn þar.

„Það eru einkum gjöldin sem eru að valda þeim vandræðum og það er áhyggjuefni. Það er einmitt hluti af því að við tókum þetta yfir í lok apríl til þess að rétta við eiginfjárstöðuna. Síðan þurfum við að skoða hvernig þetta Ohf-form virkar og hvað við getum lært af reynslunni á því."