Sigmundur: Ætlum ekki að afhenda óútfylltan tékka

Það vantaði upp á raunhæfar leiðir til að hrinda í framkvæmd þeim hugmyndum sem þegar eru komnar fram, segir Sigmundur Davíð Gunnlaugsson, formaður Framsóknarflokksins. „Það er samstaða um markmiðin, en þetta snýst um leiðirnar," segir Sigmundur.

Forystumenn Samfylkingarinnar og Vinstri grænna hugðust kynna nýja ríkisstjórn í dag en það hefur dregist vegna óánægju framsóknarmanna með drög að stjórnarsáttmálanum. „Við ætlum okkur ekki að afhenda óútfylltan tékka," segir Sigmundur, en framsóknarmenn hafa bent á að markmið ríkisstjórnarinnar verði að vera fá en skýr.

Sigmundur segir að það hafi orðið að niðurstöðu að framsóknarmenn myndu sjálfir koma með sínar eigin tillögur að því hvaða leiðir eigi að fara. Framsóknarflokkurinn muni vinna þá hugmyndavinnu í kvöld og á morgun með stuðningi hagfræðinganna Jóns Daníelssonar og Ragnars Árnasonar.

Sigmundur á von á að hægt verði að kynna nýja ríkisstjórn eftir helgi.