Hætti við að hætta

Sænskur efnahagsráðgjafi ríkisstjórnarinnar hótaði að hætta störfum vegna seinagangs hennar í endurskipulagningu bankanna. Hann setur það sem skilyrði fyrir áframhaldandi störfum að vinnslu mála verði hraðað og að efnahagsmálin verði vistuð í einu ráðuneyti. Frumvarp um nýtt efnahagsráðuneyti verður lagt fram næstu daga.

Mats Josefsson var ráðinn af Geir H. Haarde, þáverandi forsætisráðherra, til að aðstoða ríkisstjórnina við að takast á við vanda bankakerfisins. Josefsson lagði til að stofnað yrði eignaumsýslufélag sem tæki yfir 10 til 15 stærstu fyrirtæki landsins í vanda og stýrði uppbyggingu þeirra. Hann teldi bankanna ekki ráða við það verkefni. Þá lagði hann ríka áherslu á að ríkisstjórnin myndi taka við hlutverki eigenda bankanna.

Á fréttamannafundi í febrúar sagði Josefsson að fyrrverandi ríkisstjórn hefði verið of aðgerðarlaus í þeim efnum. Mikilvægt væri að koma þeim skilaboðum til bankanna að viðskiptin ættu ekki að ganga fyrir sig með sama hætti og áður.

Þolinmæði Josefsson virðist þó hafa verið á þrotum og hótaði að hætta störfum í síðustu viku. Josefsson taldi að endurskipulagning bankakerfisins hafi gengið of hægt fyrir sig.

Jóhanna Sigurðardóttir, forsætisráðherra, sagði í umræðum ´´a Alþingi í dag margvíslegar ástæður fyrir töfunum. Mat á bönkunum hafi verið flóknara en gert var ráð fyrir og samningaviðræður við kröfuhafa dregist. Þá hafi ágreiningur í þinginu um eignaumsýslufélagið m.a. vegna andstöðu framsóknarmanna og sjálfstæðismanna, valdið töfum. Josefsson hafi lagt áherslu á að endurskipulagningu bankanna yrði hraðað og efnahagsmálin vistuð í einu ráðuneyti í stað þriggja.

Þá sagði Jóhanna að á næstu dögum yrði lagt fram frumvarp um nýtt efnahagsráðuneyti.