Heilbrigðisnefnd fundar vegna inflúensunnar

Rannsókn hefur leitt í ljós að sexmenningarnar, sem talið var að kynnu að vera smitaðir af H1N1 inflúensunni, reyndust ósýktir. Áfram verður þó fylgst með heilsu þeirra, en um er að ræða skyldmenni mannsins, sem staðfest er að hafi smitast af inflúensunni í Bandaríkjunum.

Enn er í gildi hættustig hér á landi, samkvæmt viðbragðsáætlun um inflúensufaraldur, en það var meðal annars rætt á fundi sóttvarnalækna og lögreglustjóra af landinu öllu í dag.

Siv Friðleifsdóttir, þingmaður Framsóknarflokksins, hefur óskað eftir því að heilbrigðisnefnd Alþingis komi saman svo unnt sé að fá yfirlit yfir stöðu mála. Fundurinn er fyrirhugaður á morgun.