Tekur ákvörðun um framtíð St. Jósefsspítala á næstunni

Ögmundur Jónasson, heilbrigðisráðherra, hyggst á allra næstu dögum taka ákvörðun um framtíð St. Jósefsspítala en Guðlaugur Þór Þórðarson, fyrrverandi heilbrigðisráðherra, ákvað í janúar að leggja spítalann niður í núverandi mynd.

Ögmundur sagðist í umræðum á Alþingi í dag ætla að eiga viðræður við forsvarsmenn Hafnarfjarðarbæjar og leita eftir framtíðarlausn með bæjarstjóra Hafnarfjarðar. Þá mun hann funda með fulltrúum hollvinasamtaka og starfsfólki St. Jósefsspítala. Ögmundur sagði að alltof oft hafi ekki verið leitað eftir samráði við hagsmunaaðila.

Ögmundur sagði að það væri forgangsverkefni að eyða óvissunni sem fyrst og fara eigi vel með skattfé.

Siv Friðleifsdóttir, þingflokksformaður Framsóknarflokksins, var upphafsmaður umræðunnar. Hún vill að Ögmundur taki ákvörðun hið fyrsta um framtíð St. Jósefsspítala. „Ég vil því skora á heilbrigðisráðherra taka þessa ákvörðun fljótt og að gefnu samráði og eyða óvissunni sem fyrst."