Ómar Valdimarsson til Eþíópíu á vegum Rauða krossins

Ómar Valdimarsson sendifulltrúi Rauða kross Íslands hélt í gærkvöldi til Eþíópíu þar sem hann mun starfa að upplýsingamálum vegna mikilla þurrka sem geisað hafa í landinu og valdið miklum matvælaskorti.

Í tilkynningu frá Rauða krossinum segir að Ómar muni starfa með alþjóðlegu matsteymi Rauða krossins fram til 22. desember. Teymið meti þörf fyrir aðstoð og aflar fjár til hjálparstarfs en talið er að allt að 300 þúsund manns hafi orðið fyrir barðinu á alvarlegum matvælaskorti í kjölfar þurrka í fjórum til fimm héruðum í Eþíópíu.

Ríkisstjórn Eþíópíu áætlar að 6,3 milljónir manna í landinu þurfi á matvælaaðstoð að halda vegna þurrka. Óttast er að fjöldi nauðstaddra eigi eftir að fara vaxandi á næsta ári.