Ný könnun: Mikið flökt á fylgi flokkanna

Í skoðanakönnun sem framkvæmd var fyrir fréttastofu kemur í ljós að tæp 40 prósent aðspurðra eru óákveðnir þegar þeir eru spurðir hvaða flokk þeir myndu kjósa ef kosið væri í dag. Mikið flökt virðist vera á fylgi flokkanna.

Ríkisstjórnin nýtur stuðnings 52 prósenta aðspurðra en 26 prósent styðja hana ekki. 18 prósent voru óákveðnir og um fjögur prósent vildu ekki svara.

Könnunin var framkvæmd í gær og var úrtakið 800 manns. Spurt var hvaða flokk fólk myndi kjósa og um afstöðu til nýrrar ríkisstjórnar.

Nánar verður greint frá niðurstöðum könnunarinnar í fréttum Stöðvar 2 klukkan hálf sjö en niðurstöðurnar gefa vísbendingu um að mikið flökt sé á fylgi flokkanna ef miðað er við síðustu kannanir.