Fyrsta inflúensutilfellið sem smitast á Íslandi greint

Fjórða tilfelli inflúensu A(H1N1) hefur greinst á Íslandi. Þar á í hlut kona á miðjum aldri og allt bendir til þess að hún hafi smitast af hjónum sem komu hingað frá Bandaríkjunum 3. júní síðastliðinn og greindust bæði með veikina. Þetta kemur fram í tilkynningu frá sóttvarnalækni og almannavarnadeild ríkislögreglustjóra.

Þar segir jafnframt að þetta síðasta tilfelli megi rekja til smits hér innanlands en þeir þrír, sem áður höfðu greinst með inflúensuna hérlendis, smituðust allir í Bandaríkjunum og veiktust eftir komuna til Íslands.

Fulltrúar sóttvarnalæknis, almannavarnadeildar ríkislögreglustjóra, heilbrigðisráðuneytis og dómsmálaráðuneytis ræddu stöðu mála á fundi í morgun. Í ljósi þess að Alþjóðaheilbrigðisstofnunin (WHO) hefur lýst yfir heimsfaraldri, og þar með fært sig upp á neyðarstig gildir það sama hérlendis.

Þrátt fyrir það var ákveðið á fundinum að vinna áfram samkvæmt hættustigi viðbragðsáætlunar hérlendis í ljósi þess að veikin sé yfirleitt væg, bæði erlendis og hérlendis. Fram kemur að þetta sé einnig í samræmi við skilning WHO.