Beaty átti „árangursríkan“ fund við Steingrím

Ross Beaty, forstjóri og aðaleigandi Magma Energy hitti Steingrím J. Sigfússon fjármálaráðherra að máli í morgun. Beaty segir í samtali við fréttastofu að fundurinn hafi verið árangursríkur þó ekki hafi fengist klár niðurstaða. „Við skiptumst á skoðunum og hugmyndum en eigum eftir að ræða betur saman," segir Beaty.

Magma Energy hefur sóst eftir auka við hlut sinn í HS Orku með því að kaupa hlut Orkuveitunnar. Hugmyndir hafa hins vegar vaknað um að hið opinbera komi með einhverjum hætti að kaupunum á hlut Orkuveitunnar til þess að svo stór hlutur í HS Orku komist ekki í hendur einkaaðila.

Orkuveitan hefur frest til mánaðamóta til að svara tilboði Magma Energy í hlutinn. Samkvæmt upplýsingum fréttastofu úr fjármálaráðuneytinu, hefur verið rætt um ríki, Reykjavíkurborg og Rafmagnsveitum ríkisins, eignist ríflega fimmtungshlut í HS orku. Orkuveita Reykjavíkur eigi þá áfram 10%, sem henni er heimilt, samkvæmt úrskurði samkeppnisráðs.